Ratos de biblioteca I
01-10-2007
Paula Carballeira naceu en Maniños. Alí decatouse de que o mundo se pode descubrir xogando, e que xogando é como se fai o teatro e como se aprende a escribir. Desde daquela, tivo a sorte de vivir do conto, e contando historias viaxa. Fai teatro na compañía Berrobambán, participa nalgunhas series de televisión e nas noites de lúa chea ponse a escribir. Así leva publicados doce libros e ten moitos máis agardando que a lúa tire por eles.
Escollín contos de ratos, historias diferentes de ratos protagonistas que actúan con intelixencia, se cadra por teren nos xenes algo de ratos de biblioteca. Noutros casos, seleccionei historias que, se fose rato, querería mastigar, porque falan de libros, do que é ler ou do que é ter paxaros fantásticos na cabeza.